ZINETIKA jaialdiak bat egin du “K” sariekin
ira 3, 2021
ZINETIKA jaialdiak “K” sarien lehen edizioan parte hartu du. Ekimen hori Kresala zineklubak bultzatu du, Azkoitiko Zinetogram, Beasaingo Goieniz eta Urretxu-Zumarragako Butak21 zineklubekin elkarlanean, baita Gipuzkoan egiten diren hainbat zinema-jaialdirekin elkarlanean ere: Animadeba, Zinema Jaialdia Zeinuen Lengoaian, Donosskino eta Amua, ZINETIKAz gain.
Iraila eta abendua bitartean egiten diren jaialdi horietako bakoitzean, 3 zineklubetako kideek osatutako epaimahai batek film bat aukeratuko du; elkarte horien oinarri diren balioak, kalitatea, bestelakoa izatea, originaltasuna eta abar kontuan hartuta.
Sarituetako bakoitzak Iker Babacek eta Asier Arizkorretak osatzen duten diziplina anitzeko Egingela taldeak sortutako “K” formako 20 cm-ko garaikurra jasoko du.Urte amaieran saritutako film guztiekin saio bereziak antolatuko dira Gipuzkoako hainbat herritan.
Ekimen honen helburua hainbat zinematografia zabaltzea, atxikitako jaialdien oihartzuna zabaltzea eta jaialdi eta zinekluben kopurua handitzen laguntzea da, datozen urteetara begira.
“K” sarien aurkezpena abuztuaren 30ean egin zen, 20:00etan, Tabakalerako 4. solairuko terrazan. Ekitaldian parte hartuko zuten jaialdietako ordezkariek beren proiektuak aurkeztu zituzten. Aurkezpen horren ondoren, proiekzio-saio bat programa zen; horretan, jaialdi bakoitzak proposatutako film labur bat ikusi ahal izan zen. ZINETIKAri dagokionez, “Sisters” (Daphne Lucker, 2018) proiektatu zen, 2019ko ZINETIKA edizioan Film Onenaren kategorian irabazlea. Desegituratutako etxe batean bizi diren hiru ahizpa aurkeztuko dizkigu lan honek. Beren buruaren mende bizi dira eta elkarrekin dauden bitartean biziraunen dute. Baina haien arteko maitasuna nahikoa indartsua al da inguratzen dituen ingurune goibelean irauteko?
“Sisters” ez gain honako hauek ere proiektatu ziren: “Cerdita” (Carlota Martinez Pereda, 2018); “Beldur Malutak” (Ander Iruretagoiena, Telmo Irureta, 2019); “Ama Hil Egin Zaigu” (Bira produkzioak, 2021); “Monsieur Michel” (Julien Bourges, 2019); “I Said I Would Never Talk About Politics” (Aitor Oñederra, 2015); “Sirenas” (Aitor Guerrero, 2021) eta “La tierra llamando a Ana” (Fernando Bonelli, 2019).